الساليزونات وجبه خفيفه محببه لدا الاطفال جميله وخفيفه والكل هيحبها
تفضل اكلها طازه
المقادير:-
مقادير العجينة :-
(انا بسميها العجينة السحرية عشان بستخدمها فى عمل حاجات كتير جداً)
1كيلو دقيق
1 بيضة
4 معالق كبيرة لبن بودرة (وان لم يتوفر استخدمى نصف كوب لبن عادى) .
2 ملعقة سمنة كبيرة بدرجة حرارة الغرفة.
1 ملعقة صغيرة ملح
1 ملعقة صغيرة محسن خبز (هتلاقية عند فتح الله او كارفور)
1 ملعقة صغيرة زعتر
2 ملعقة كبيرة خميرة فورية أو (قطعة خميرة بيرة)
3 معالق سكر (2مع الخميرة و1 مع العجين)
ماء دافئ للعجن
مقادير الحشو:-
1 كيلو طماطم مقطعة مربعات صغيرة
ربع كيلو فلفل رومى اخضر او الوان (فلفل كبى)
بسطرمة او سدق اوسوسيس أو لحمة مفرومة متعصجة (حسب الرغبة)
ربع كيلو جبنة موتزاريلا أو شيدر أو رومى مبشورة (يفضل موتزاريلا)
ربع كيلو زيتون مقطع حلقات صغيرة
ربع كوب صلصة طماطم بالثوم
طريقة التحضير:-
1-نضع كل مقادير العجينة الجافة مع بعض ونقلبهم جيدا ثم نضع المقادير السائلة ما عدا الخميرة ومعلقتين سكر .
2-فى اناء اخر نضع الخميرة مع معلقتين السكر وقليل من الماء الدافئ ويترك حوالى 3 دقائق حتى يخمر ثم يضاف لباقى المقادير.
3-وتعجن العجينة باليد جيدا حتى تصبح عجينة يسهل تشكيلها (لا تلزق فى اليد)
ثم نغطيها بكيس نايلون ونلف الاناء بفوطة كبيرة او قطعة قماش كبيرة ونتركها فى مكان دافئ لمدة ساعة أو أكثر .
*** لو عايزة تبدعى هاتى الوان طعام من عند بياع لوازم الحلويات مثل (مطير ف المنشية) وقسمى العجينة بعد ما تعجنيها إلى قطع حسب عدد الالوان المستخدمة وزودى نقطتين ماء على اللون واعجنى بيه العجينة لحد ما يمتزج اللون بالعجينة
4- وحطى كل قطعة ف كيس وسيبيها تخمر .
5-ثم تشكل بعد ذلك إلى دوائر صغيرة (مينى بيتزا) أو شكل حلزونى أو مستطيل مطبق وتحشى حسب الرغبة بالحشو السابق ذكرة .
6-وممكن ان نعمل كور صغيرة أو أشكال بيضا وية وندخلها الفرن وعند خروجها تكون على شكل (مينى كيزر وفينو) ويتم حشوها بشرائح الطماطم والفلفل والجبنة حسب الرغبة.
7-ثم ندهن صاج الفرن أو اى صينية بقليل من الزيت ونرص فيها الساليزونات وندخلها الفرن على درجة حرارة متوسطة لمدة 10 دقائق تقريباً وقد تختلف مدة الطهى حسب نوع البوتاجاز .
وبالهنا والشفا