طريقه عمل صابونه الجرجير للشعر

صابونة الجرجير لتطويل الشعر تعالي شوفي ازاي تعمليها . العناية بالشعر .
بما ان اكتر الشامبوهات منتجات كميائية ضررها للشعر اكتر من فايدتها والشعر مع الوقت
هيتعب من المواد الضارة دي وبعدها هندور على بديل للشامبوهات العادية
المتوفرة بالسوق وكدة ونفضل ندور على شامبو عشبي من مواد طبيعية
لكن برظوا الشامبوهات دي مش متوفرة بالسوق اوي ونفضل ندور هنا وهناك
وبما ان في شامبوهات طبية لتطويل الشعر ودي طبعا كويسة لكن برظوا
مش متوفرة بالاسواق ده من غير سعرها الغالي وبرظوا فيهم الاصلي والتقليد
ودول تبقى البنات محتارين فين الاصلي منهم وفين التقليد اللي لو اشترته واستعملته
هيدمر شعرها اكتر من الاول طب هنعمل ايه بقى ؟؟؟

انا بقى عندي الحل وروحت عملت حاجة بديلة لكل دووووول تعرفي هي ايه ؟
طبعا العنوان بيقولك صابونة الجرجير هههههههههههه ايون صابونة الجرجير
لتطويل الشعر وطبعا كولنا عارفين ايه هو الجرجير وفايدته للشعر ايه
وده غني عن التعريف ومش هتكلم عليه لانكم عارفين اهمية نبات الجرجير
لمنع تساقط الشعر وتطويله وتغذيته

طبعا الصابونة اللي عملتها دي بنات جربوها وشافوا نتايج حلوة بعد الاسبوع الاول والحمد لله
المهم مش هرغي كتير لانكم لو تشوفوا مكوناتها هتعرفوا كل حاجة منهم وفايدته للشعر.

المقادير المطلوبه لعمل الصابون:-

1- ٢حزمه جرجير وطبعا كلنا عارفينه موجود عند بتوع الخضار

2-صابون حلبى من العطار اى صابونه طبعيه فى بالزيتون حلوة اوى

3-زيت زيتون - زيت خروع - زيت حبه البركه - زيت سمسم

4-مقدار مايا لزوم العجن وكده

طريقه تحضير الصابونه:-

1-ابشرى نص الصابون بالمبشرة.

2-اغسلى حزمتين الجرجير وقطعيهم وحطيهم فى الخلاط مع نص كوب ماء اضربيهم كويس(عصير جرجير) وبعدين صفيهم بشاشه بيضا او مصفاء علشان يبقا عصير خالى من اى شوائب.

3-حطى عصير الجرجير على نص الصابون المبشورة واخلطيهم مع بعض بمعلقه.

4-بعدين حطى معلقتين اكل من زيت الزيتون فوق الخليط.

5-بعدين معلقتين اكل من زيت الخروع.

6-بعدين حطى معلقتين اكل من زيت حبه البركه.

7-بعدين معلقتين اكل من زيت السمسم.

8-اخلطيهم بقا كويس اوووى سواء.عن طريق العجن.علشان تبقا مكونات متجانسه معا وممكن تحطيهم فى الخلاط بس افضل العجن بالايد.

9-حطى بقا العجينه فى اى قالب عند بأى شكل 

بس خدى بالك افرشي كيس فى القالب من تحت وبعدين حطى خليط الصابون فى القالب وحطى فوقها كيس بلاستيك واضغطى عليهم شوية علشان تاخد شكل القالب.

10-سبيها يوم كامل بدرجه حرارع الغرفه لحد ما تنشف.

11-شيلى الكيس الى من فوق وسبيهم يوم تانى تنشف بعدين طلعيها من القالب وسبيها تنشف خالص جدا جدا

وبكده بقا عندك صابونه للشعر كل مكوناتها طبعيه ومفيده للشعر كلها بتطول وتنعم الشعر

دلوقتي بقى نيجي على طريقة الاستخدام 

لما تبليلي شعرك خدي الصابونة دي واغسلي فيها شعرك عادي لكن سيبي الرغوة على شعرك 

لمدة خمس دقايق عشان يستفاد من المواد اللي فيها وعشان البصيلات هتكون مسانها مفتوحة 

لانها مبللة وطبعا هتكون مفتوحة اكتر من العادي وبكدة الشعر هيستفاد من مكونات الصابونة دي 

وبكدة ريحتي شعرك من الشامبوهات الكميائية اللي تضر شعرك طبعا والصابونة دي امنة جدا لشعرك 

وهيستفاد منها لان مكوناتها كولها طبيعية ومفيدة للشعر .